Erdogan, sinjale lufte me Izraelin

Turqia mund të hyjë në Izrael për të ndihmuar palestinezët siç bënte dikur në Libi dhe Nagorno-Karabakh, tha presidenti Tajip Recep Erdogan, duke paraajmëruar kështu nisjen e një lufte në Lindjen e Mesme, e cila, siç parashikohet, mund të çojë drejt një konflikti të tretë botëror.

“Ne duhet të jemi shumë të fortë në mënyrë që Izraeli (në) Palestinë të mos mund të bëjë atë që po bën tani (…), tha presidenti turk në një tubim të partisë në pushtet AKP në qytetin Rize të Detit të Zi, duke vlerësuar rezultatet e industrisë ushtarake turke.

“Ashtu siç hymë në Karabak dhe Libi, ne mund të bëjmë diçka të ngjashme me ta,” tha Erdogan në një fjalim televiziv.

Presidenti turk nuk specifikoi se çfarë lloj ndërhyrjeje kishte në mendje dhe përfaqësuesit e partisë së tij nuk iu përgjigjën një pyetjeje për detajet e deklaratës së tij.

Mesazhet nga Ankaraja sollën reagime nga Tel Avivi. Ministri i Jashtëm izraelit, Israel Katz, në përgjigjen e tij e krahasoi presidentin turk me ish-udhëheqësin irakian Sadam Husein.

“Erdogan po shkon në rrugën e Sadam Huseinit dhe po kërcënon të sulmojë Izraelin. Thjesht duhet të mbani mend se çfarë ndodhi atje dhe si përfundoi”, shkroi Katz në Platformën X, raporton Times of Israel.

Në vitin 2020, Ankaraja dërgoi trupa dhe pajisje ushtarake në Libi për të mbështetur Qeverinë Libiane të Unitetit Kombëtar dhe udhëheqësin e saj Abdulhamid al-Dbeibah.

Vitin e kaluar, Turqia mohoi përfshirjen e drejtpërdrejtë në operacionin ushtarak të Azerbajxhanit në Nagorno-Karabakh, por theksoi se po mbështeste aleatin e saj të ngushtë “me të gjitha mjetet”, duke përfshirë trajnimin dhe modernizimin e ushtrisë. /tesheshi.com/