Lekaj, VV-së: Hajdeni dhe propozoni pesë emra për Kryetar Kuvendi, pa Haxhiun
Nënkryetari i AAK-së, Pal Lekaj, ka thënë se kryetari i VV-së, Albin Kurti, s’i ka numrat për krijimin e qeverisë.
Lekaj tha se për këtë ka propozuar që të ulen të gjitha partitë që të flasin dhe ta formojnë një qeveri gjithëpërfshirëse dhe sipas tij, të zgjidhen shumë probleme.
“Për ta dërguar vendin në zgjedhje, duhet një dialog i të gjitha subjekteve politike, po e konstituojmë kuvendin dhe po dakordohemi për datë të zgjedhjeve. Prapë kemi me ardhë te qeveria, krejt kjo do të ndodhë sepse pas 8 muajve prapë do të shkojmë në zgjedhje sepse askush s’i ka 2/3 për presidentin”, tha Lekaj në “DPT te Fidani” në Klan Kosova.
Tutje, Lekaj i propozi Lëvizjes Vetëvendosje që të takohen me subjektet politike dhe t’ua japin pesë emra, duke mos e përfshirë atë të Albulena Haxhiut, për postin e Kryetarit të Kuvendit.
“Saranda Bogujevci dhe Shqipe Selimi janë më të pranueshme. E dimë krejt historinë e Sarandës, ka qenë nënkryetare, figurë e çmuar, e pranueshme. Le të propozojnë pesë kandidatë, le të vijnë me pesë kandidatë pa Albulena Haxhiun dhe të thonë ‘këta pesë, cili është i pranueshëm’ dhe dalim prej kësaj krize”.
“Mirëpo, duhet në dakordancë me të gjitha partitë politike, përfshirë edhe Listën Serbe, por jo për qeveri, por për konstituim të Kuvendit”, tha Lekaj.
