Stamboll, përfundon takimi trepalësh Turqi-Rusi-Ukrainë për paqe midis Moskës dhe Kievit

Takimi trepalësh midis Turqisë, Rusisë dhe Ukrainës që u organizua me qëllim të gjetjes së rrugëve drejt paqes midis Moskës dhe Kievit përfundoi sot në Stamboll, raporton Anadolu.

Ministri i Jashtëm turk Hakan Fidan udhëhoqi bisedimet, të cilat u zhvilluan në Pallatin Dolmabahçe në Stamboll dhe zgjatën rreth 1 orë e 45 minuta, sipas Ministrisë së Jashtme turke.

Delegacioni i Turqisë përfshinte edhe drejtorin e Organizatës Kombëtare të Inteligjencës (MIT), Ibrahim Kalın.

“Duhet ta shfrytëzojmë këtë mundësi për të ecur përpara në rrugën drejt paqes”, tha Fidan gjatë fjalimit të tij hapës, duke iu drejtuar delegacioneve nga Rusia dhe Ukraina si dhe ndërmjetësve turq.

Delegacioni rus u drejtua nga Vladimir Medinskiy, ndihmës presidencial i presidentit rus Vladimir Putin, dhe përfshinte zëvendësministrin e Jashtëm Mikhail Galuzin, drejtorin e Drejtorisë Kryesore të Inteligjencës së Shtabit të Përgjithshëm Igor Kostyukov, zëvendësministrin e Mbrojtjes Alexander Fomin dhe zyrtarë të tjerë.

Ministri ukrainas i Mbrojtjes, Rustem Umerov kryesoi delegacionin e Ukrainës, i shoqëruar nga zëvendësministri i Jashtëm Sergiy Kyslytsya, zëvendësshefi i Shërbimit të Sigurisë Oleksandr Poklad, zëvendësshefi i Shërbimit të Inteligjencës së Jashtme Oleh Luhovskyi, këshilltari i kreut të Zyrës së Presidentit, Oleksandr Bevz dhe të tjerë.