Pedro Sanchez: Duhet të ushtrohet presion mbi Izraelin që të ndalojë masakrat në Gaza

Kryeministri spanjoll Pedro Sanchez bëri thirrje sot për “ushtrimin e presionit mbi Izraelin për të ndaluar masakrën në Gaza”, duke thënë se Spanja do të propozojë që Gjykata Ndërkombëtare e Drejtësisë të “vendosë” mbi aksesin e ndihmës humanitare në enklavën palestineze.

“Kriza shumë serioze humanitare që ka ndodhur në Gaza që nga tetori i vitit 2023 ka shkaktuar më shumë se 50,000 vdekje, 100,000 plagosje dhe dy milionë njerëz të zhvendosur “, kujtoi kreu i qeverisë spanjolle, gjatë një fjalimi që mbajti në një Samit të Ligës Arabe në Bagdad.

Përballë këtyre elementëve “të papranueshëm” që sfidojnë “parimin e njerëzimit”, ne duhet të “intensifikojmë presionin tonë ndaj Izraelit për të ndaluar masakrën në Gaza, veçanërisht përmes kanaleve që na ofron e drejta ndërkombëtare” , vazhdoi udhëheqësi socialist.

Për këtë arsye, Spanja do t’i “paraqesë Asamblesë së Përgjithshme të Kombeve të Bashkuara një propozim që do të synojë t’i kërkojë Gjykatës Ndërkombëtare të Drejtësisë të vendosë mbi respektimin e detyrimeve të Izraelit për sa i përket aksesit në ndihmë humanitare në Gaza”, vazhdoi ai.

Gjatë fjalimit të tij, Sanchez sqaroi gjithashtu se Spanja do të paraqesë një projekt-rezolutë tjetër duke i bërë thirrje Izraelit “t’i japë fund bllokadës humanitare që ka vendosur në Gaza” dhe të garantojë “qasje të plotë dhe të papenguar për ndihmë humanitare” në enklavën palestineze.

Gjatë një fjalimi para parlamentit spanjoll më 7 maj , kryeministri spanjoll kishte njoftuar tashmë se Spanja do të paraqiste një projekt-rezolutë me “masa emergjente për të ndaluar masakrën e civilëve” dhe garanci për hyrjen e “ndihmës humanitare” në Gaza.

Përveç këtyre nismave të ndryshme, duhet “të bëhet përparim në një zgjidhje politike” në rajon, këmbënguli sot Sanchez, duke vlerësuar se “e vetmja rrugë drejt paqes në rajon” është “zbatimi i zgjidhjes me dy shtete”.

Për këtë arsye, “do të doja t’u bëja edhe një herë thirrje shteteve të tjera që ta njohin shtetin e Palestinës”, theksoi ai.

Spanja, e cila njohu shtetin e Palestinës më 28 maj 2024, në të njëjtën kohë me Irlandën dhe Norvegjinë, është shfaqur në muajt e fundit si një nga zërat më kritikë brenda BE-së ndaj qeverisë së Benjamin Netanyahut.