Ku është ministri i punës dhe politikës sociale Fatmir Limani, kur shqipja thyhet para syve të tij?
Tabela në Qendrën për punë sociale Prilep, ishte në dy gjuhësi, pas futjes së Vmrosë u vandalizua që në fund të përfundojë pa mbishkrim fare !
Në hyrje të Qendrës për Punë Sociale në Prilep, që bie nën përgjegjësinë e Ministrisë së Punës dhe Politikës Sociale, qëndron një tabelë institucionale e cila prej kohësh është e dëmtuar pikërisht aty ku është shkruar gjuha shqipe. E thyer, e fyer dhe e lënë pas dore – kjo është pamja që i ofrohet qytetarëve shqiptarë të Prilepit dhe Dollnenit sa herë që shkojnë për të kërkuar ndihmë, drejtësi apo të drejtat e tyre sociale.
Ministri aktual, i njohur si “ministri i Mickut”, vazhdon të qëndrojë në detyrë, por as për një tabelë nuk ka guxim, vullnet apo interes që ta rregullojë. Po si mund të mbrojë shqiptarët e Dollnenit e Prilepit, kur nuk është në gjendje të mbrojë as simbolin më minimal të përfaqësimit të tyre – gjuhën?
A ka shkuar ndonjëherë ky ministër t’i vizitojë të punësuarit shqiptarë në këtë institucion? A është interesuar si ndihen ata, të heshtur përballë një tabele që ua mohon gjuhën dhe identitetin çdo ditë? A ka pyetur ndonjëherë qytetarët shqiptarë që shkojnë për të kryer një shërbim, se si ndihen kur lexojnë një tabelë të gjymtuar – ku maqedonishtja qëndron e plotë, ndërsa shqipja është e grisur?
Përfaqësimi nuk është vetëm një emër në një zyrë, por është veprim. Është kujdes për detajet, për dinjitetin e qytetarëve. Nëse nuk je në gjendje ta mbrosh gjuhën në një tabelë – mos premto se do të mbrosh popullin.
Shqiptarët e Dollnenit dhe Prilepit nuk kanë nevojë për ministra që heshtin, por për zëra që veprojnë.
Cini Cini Jasin Jusufi 18.05.2025
