Tiranë/ 15-vjeçari aksidenton për vdekje të moshuarin në Yrshek

Një aksident i rëndë ka ndodhur pasditen e sotme në zonën e Yrshekut në Tiranë, ku një 15-vjeçar ka aksidentuar për vdekje një të moshuar. Sipas informacionit zyrtar nga policia, rreth orës 14:40, i mituri, duke drejtuar një automjet që i përkiste familjarëve të tij, ka përplasur 82-vjeçarin S. V., i cili po lëvizte me biçikletë.

Pavarësisht përpjekjeve për ta transportuar me urgjencë drejt spitalit, i moshuari ka ndërruar jetë rrugës për shkak të plagëve të marra.

Njoftimi i policisë:

Specialistët e qarkullimit rrugor bënë arrestimin e shtetasit të mitur 15 vjeç, pasi në Yrshek, ditën e sotme, rreth orës 14:40, dyshohet se duke drejtuar një automjet të familjarëve të tij, ka aksidentuar shtetasin S. V., 82 vjeç, i cili po lëvizte me biçikletë.

Si pasojë 82-vjeçari ka humbur jetën rrugës për në spital.

Materialet procedurale iu referuan Prokurorisë së Tiranës, për veprime të mëtejshme.