Izraeli arreston aktivistët e Madleen-it dhe e tërheq anijen drejt portit të Ashdodit për dëbim

Marina izraelite ka arrestuar të gjithë aktivistët dhe ekuipazhin në bordin e anijes Madleen, e cila po transportonte ndihma humanitare drejt Gazës në përpjekje për të thyer bllokadën shumëvjeçare. Sipas burimeve ndërkombëtare, anija është e tërhequr aktualisht drejt portit të Ashdodit, në jug të territorit të pushtuar të Palestinës, me qëllim dëbimin e aktivistëve drejt vendeve të tyre.

Zyrtarë izraelitë kanë konfirmuar se Madleen është marrë nën kontroll dhe po i nënshtrohet procedurave në port. Aktivistët pritet të deportohen pas hetimeve dhe formaliteteve ligjore të vendosura nga autoritetet izraelite.

Kjo ndodhi pas një ndërhyrjeje të dhunshme në ujërat ndërkombëtare, ku anija u sulmua me lëndë kimike përmes dronëve, u pengua në komunikim dhe më pas u bastis nga forcat izraelite.

Freedom Flotilla Coalition dhe organizata të të drejtave të njeriut kanë dënuar ashpër këtë akt, duke e cilësuar si shkelje të të drejtës ndërkombëtare dhe një akt agresioni ndaj një misioni civil paqësor. Thirrjet për lirimin e menjëhershëm të aktivistëve dhe kthimin e anijes janë rritur ndërkombëtarisht.