Kongresi i parë i të drejtave të njeriut

Në vitin 10 hixhri, Profeti (a.s) kreu të vetmin haxh në jetën e tij sepse në vitin pasardhës ai (a.s.) shkoi tek Zoti i tij. Ky haxh është njohur si “haxhi i lamtumirës”.

Duke qenë se adhurimet islame nuk janë thjesht rite dhe formalitete por kanë qëllime në vetvete, kushdo që mediton në haxhin e kryer nga Profeti (a.s) do të gjejë se në këtë haxh është organizuar një “kongres i madh”i Umetit musliman. Në këtë haxh mori pjesë shumica e sahabëve. Gjatë haxhit, në Arafat, Profeti (a.s) mbajti hytben e tij të njohur për të deklaruar kartën e të drejtave dhe detyrimeve.

Në këtë hytbe (kongres), ai (a.s)  ka folur për pohimin nga ana e Sheriatit se besimtarët janë vëllezër, ashtu sikurse thotë Allahu i Lartësuar në Kuran: “Me të vërtetë besimtarët janë vëllezër”[1], ka folur për barazinë e Islamit si një Umet të vetëm duke thënë: “Zoti juaj është Një, babai juaj është një, të gjithë keni jeni bij të Ademit dhe Ademi është krijuar nga dheu. Më i miri ndër ju tek Allahun është ai që është më i devotshëm. Arabi nuk ka ndonjë dallim nga joarabi vetëm se nëpërmjet devotshmërisë.”

Në këtë hytbe (kongres) ka shfuqizuar të gjitha zakonet zullumqare të  periudhës injorante paraislamike duke thënë: “Kamata e kohës së injorancës ka përfunduar (është anulluar), gjakmarrja e kohës së injorancës ka përfunduar (është anulluar), traditat e këqija të kohës së injorancës kanë përfunduar (janë anulluar), me të vërtetë shtyrja e një muaji në vend të një tjetri nuk është vetëm se rritje në mosbesim.” Për këtë ai (a.s) dha shembullin i pari, sepse prijësi duhet të jetë nismëtar i asaj që thotë dhe duhet të mbartë i pari  mbi supet e tij përgjegjësitë. Madje këto fjalë i vuri i pari në zbatim duke thënë:“Kamata e parë që unë e anulloj është kamata e xhaxhait tim Abasit. Gjakmarrja e parë që e anulloj është gjaku për Amir ibn Rib’ij ibn Harith ibn Abdulmutalibit”

Në këtë hytbe (kongres) ka deklaruar fuqishëm barazinë midis grave dhe burrave të drejtat dhe përgjegjësitë që kanë ata ndaj njëri-tjetrit. Ai (a.s) ka këshilluar burrat që të sillen mirë me gratë. Madje ka filluar me të drejtat e burrave ndaj grave duke thënë: “Padyshim që ju janë dhënë disa të drejta mbi gratë tuaja dhe grave tuaja disa të drejta mbi ju.”

Në këtë hytbe (kongres) theksoi se për çështjet sociale i gjithë autoriteti dhe qeverisja i takon fesë. Njeriu është mëkëmbësi i Allahut në Tokë, është ai i cili është përgjegjës për popullimin dhe ndërtimin e civilizimit në Tokë. Ligjet hyjnore janë nenet e këtij traktati dhe aktit të mëkëmbësisë duke miratuar lirinë e përzgjedhjes së njeriut nën kornizën e gjërave të pandryshueshme dhe universale të këtij traktati. Ai (a.s.) ka thënë: “Unë kam lënë në mesin tuaj dy gjëra që nëse ju kapeni fort pas tyre nuk keni për të humbur kurrë. Kam lënë në mesin tuaj Librin e Allahut dhe Sunetin e Profetit të Tij.”

Në këtë kongres të madh, Profeti (a.s) ka hartuar për njerëzimin “Traktatin njerëzor (Islam)” të mirëorganizuar të përshtatshëm për gjëra të kufizuara dhe për detaje e hollësira i cili qeveris të drejtat dhe detyrimet që ka njeriu.

Profeti (a.s) – në këtë kongres – nuk i është drejtuar vetëm të pranishmëve, por i është drejtuar mbarë njerëzimit në çdo kohë dhe në çdo vend duke thënë: “Ndoshta ai që e dëgjon lajmin e kupton atë më mirë se ai që e përcjell atë.” Kjo hytbe do të ngelet përjetësisht udhëzim për të gjithë njerëzit pavarësisht kalimit të shekujve apo ndryshimit të mjediseve, racave dhe kombësive.

A do të kenë mundësi organizatat e botës islame që të ringjallin Sunetin e Profetit (a.s) duke organizuar kongresin e madh – obligimin e haxhit në vendin e shenjtë – për të përmbushur qëllimet kryesore të haxhit duke parë gjëndjen e Islamit dhe të muslimanëve?!

Autor: Muhamed ibn Amare

Përktheu: Elton Harxhi

[1] – Sure Huxhurat: 10.