“Arritjet” e shtetit që mishëron “qytetërimin perëndimor” në Lindjen e Mesme

Muhammad Zakaria Ayoub al-Matuk, një djalë tetëmbëdhjetë muajsh nga një vendbanim me tenda në qytetin e Gazës, do të vdesë nga uria nëse situata humanitare në Rripin e Gazës nuk ndryshon së shpejti. Ai kohët e fundit humbi tre kilogramë dhe tani është vetëm gjashtë.

Programi Botëror i Ushqimit (ËFP) paralajmëron se 70,000 fëmijë në Rripin e Gazës kanë nevojë për kujdes urgjent mjekësor për shkak të kequshqyerjes akute, raporton CNN.

Të gjithë 2.1 milion banorët e Gazës nuk kanë qasje të qëndrueshme në ushqim. Ministria Palestineze e Shëndetësisë thotë se 900,000 fëmijë që jetojnë në Rripin e Gazës vuajnë nga uria.

Më shumë se njëqind organizata ndërkombëtare humanitare paralajmëruan të mërkurën se tregjet në Gaza janë bosh, jashtëqitjet njerëzore janë kudo, sëmundjet po përhapen me shpejtësi rrufeje dhe njerëzit po bien përtokë nga uria dhe dehidratimi.

“Çdo ditë pa një rrjedhë të qëndrueshme ndihme humanitare do të thotë më shumë vdekje nga sëmundje të parandalueshme”, thuhej në një deklaratë të nënshkruar nga Mjekët pa Kufij (Medecins Sans Frontieres – MSF), Save the Children, Këshilli Norvegjez për Refugjatët dhe dhjetëra OJQ të tjera. “Fëmijët po vdesin urie, duke pritur ushqime që nuk vijnë kurrë.”

Zyra e Kombeve të Bashkuara për Koordinimin e Çështjeve Humanitare (OCHA) raportoi se 59,219 palestinezë kishin vdekur nga Izraeli deri me 23 korrik 2025. Sipas Ministrisë së Shëndetësisë të udhëhequr nga Hamasi, të paktën 101 persona, përfshirë 80 fëmijë, kishin vdekur nga uria dhe kequshqyerja deri në 22 korrik 2025, raportoi ABC.

Organizata Botërore e Shëndetësisë (OBSH) paralajmëroi të mërkurën se palestinezët në Rripin e Gazës po vuajnë nga “uria masive” sepse ndihma humanitare praktikisht nuk po i arrin ata. “Prindërit na tregojnë se fëmijët e tyre të uritur shkojnë në shtrat me lot në sy“, tha Drejtori i Përgjithshëm i OBSH-së, Tedros Adhanom Ghebreyesus. “Pikat e shpërndarjes së ushqimit janë bërë vende të dhunshme”.

Organizatat humanitare thonë se Izraeli e ka shndërruar ushqimin në armë dhe e akuzon atë për “ndëshkim kolektiv” të palestinezëve.

Kombet e Bashkuara raportojnë se më shumë se një mijë njerëz kanë vdekur duke kërkuar ushqim që kur i ashtuquajturi Fondacioni Humanitar i Gazës (GHF), i mbështetur nga Izraeli dhe Shtetet e Bashkuara, filloi të vepronte në fund të majit.

Sipas OKB-së, qindra kanë vdekur pranë vendeve të GHF-së. Fondacioni u krijua për të zëvendësuar rolin e OKB-së në ofrimin e ndihmës në Gaza, por është kritikuar për dështimin në përmirësimin e kushteve.

Agjencitë e ndihmës po i bëjnë thirrje Izraelit të heqë bllokadën, të lejojë akses të papenguar në ushqim, ujë të pastër dhe ilaçe, dhe të bëjë thirrje për një armëpushim. /tesheshi.com/