Emir Sulejmani: Po shitet toka publike e Zhelinës për interesa personale

Kandidati për kryetar të Komunës së Zhelinës, Emir Sulejmani, ka reaguar ashpër ndaj asaj që e quan “krimi më i madh ndaj tokës së Zhelinës” – shitja pjesë-pjesë e tokës publike në heshtje dhe për interesa personale.

Sipas tij, toka e komunës nuk është pronë private e udhëheqësisë aktuale, por trashëgimi e të gjithëve, amanet i brezave që e kanë mbrojtur me mund e gjak.

“Shitja e tokave publike është jo vetëm tradhti ndaj qytetarëve, por edhe krim moral që do të rëndojë mbi ta përgjithmonë,” ka theksuar Sulejmani, duke shtuar se çdo kontratë e dyshimtë do të rishikohet dhe kushdo që ka firmosur shitje të padrejta do të japë llogari.

Ai premtoi se çdo centimetër tokë publike do të mbrohet “si sytë e ballit” dhe theksoi se toka e komunës është për t’u ndërtuar e zhvilluar, jo për t’u shitur.