Shkyçja e bizneseve nga rryma/ Musliu: E papranueshme, goditje direkte – Qeveria po ndëshkon në vend se të ndihmojë

Ka nisur dje shkyçja e bizneseve nga energjia elektrike, pas vendimit të ZRRE-së që ato të kyçen në njërin nga operatorët e licencuar, raporton Gazeta Blic.

Lidhur me këtë, deputetja e PDK-së, Ganimete Musliu, thotë për Gazeta Blic se ky vendim është dëshmi e papërgjegjshmërisë së institucioneve për ekonominë e vendit.

Sipas saj, e gjithë kjo është e papranueshme që bizneset të ndëshkohen pa paralajmërim, në vend se të ndihmohen.

“Vendimi i sotëm për të shkyçur mbi 1000 biznese nga energjia elektrike, për mua është një dëshmi e qartë e papërgjegjshmërisë së institucioneve dhe e mungesës totale të vizionit për ekonominë e vendit tonë. E shoh si krejtësisht të papranueshme që në vend se t’u ofrohet mbështetje bizneseve, t’u jepet kohë dhe ndihmë për t’u përshtatur me tregun e lirë të energjisë, ato ndëshkohen pa paralajmërim të mjaftueshëm dhe pa një plan të qartë. Qeveria dhe ZRRE kanë dështuar të krijojnë një periudhë tranzicioni të drejtë, një strategji komunikimi, apo ndonjë formë praktike që do t’u mundësonte këtyre bizneseve të përshtateshin pa rrezikuar ekzistencën e tyre”, shprehet ajo.

Musliu thekson se kjo është goditje direkte nga prodhimit vendor dhe stabilitetit ekonomik.

“Unë nuk e shoh këtë vetëm si një paaftësi teknike. Kjo është një goditje e drejtpërdrejtë ndaj prodhimit vendor, ndaj punësimit dhe ndaj stabilitetit ekonomik të vendit. Ndëshkohen ata që e mbajnë gjallë ekonominë, ndërsa institucionet fshihen pas rregulloreve që vetë nuk i kanë zbatuar me përgjegjësi”, vlerëson deputetja për Gazeta Blic.

Ajo ka kritikuar qeverinë për mos dalje në mbrojtje të ekonomisë dhe qytetarëve, teksa ka kërkuar ndalje të shkyçjeve dhe transparencë për gjithë procesin.

“Kur një qeveri nuk është në gjendje të mbrojë ekonominë dhe qytetarët e vet, atëherë nuk është në shërbim të vendit por thjesht një administratë që menaxhon keq krizat që vetë i krijon. Unë kërkoj ndërprerje të menjëhershme të këtyre shkyçjeve, transparencë të plotë për mënyrën si është menaxhuar ky proces dhe llogaridhënie për këtë papërgjegjshmëri të rëndë që po dëmton biznesin vendor dhe të gjithë ekonominë tonë”, deklaron deputetja e PDK-së, Ganimete Musliu./Gazeta Blic/