Bujar Osmani sjell befasi të madhe: Arkitekti botëror Michel Rojkind do të dizajnojë vizionin e ri të Çairit!
Kandidati i AKI-së për kryetar të Çairit, Bujar Osmani, ka bërë një njoftim që ka zgjuar vëmendje të madhe publike: një nga arkitektët më me ndikim në botë, Michel Rojkind, do të sjellë përvojën e tij globale në hartimin e një vizioni të ri për të ardhmen e Çairit.
Rojkind, i lindur në Meksikë, është i njohur për projektet e tij të mëdha që ndërthurin arkitekturën me dimensionin social dhe kulturor. Revista prestigjioze Forbes e ka vlerësuar si “përfaqësuesin kryesor të gjeneratës së arkitektëve më me ndikim në botë”, ndërsa studion e tij “Rojkind Arquitectos” e ka renditur në mesin e 10 firmave më inovative të reja globale.
Në listën e projekteve të tij madhështore përfshihen “Nestlé Chocolate Museum” (2007), “Cineteca Nacional Siglo XXI” (Qendra Kombëtare e Filmit në Meksikë), “Mercado Roma” në Ciudad de México, si dhe dizajne të guximshme për qendra tregtare dhe rezidenca moderne. Përveç kësaj, ai ka ligjëruar në universitete prestigjioze si Harvard, University of Pennsylvania dhe Aalto University.
Sipas Osmanit, Rojkind do ta përdorë këtë përvojë për të ndihmuar Çairin në transformimin urban, duke sjellë ide që vendosin në qendër jetën e qytetarëve, hapësirat publike, gjelbërimin dhe përfshirjen sociale.
“Ky është një hap gjigant drejt ndërtimit të një Çairi më modern, më të jetueshëm dhe më të hapur për të ardhmen. Angazhimi i Rojkind është garanci se vizioni ynë do të jetë i guximshëm, i besueshëm dhe transformues,” – theksoi Osmani.
