Në Stamboll u zhvillua një samit i rëndësishëm për situatën në Rripin e Gazës, ku morën pjesë ministrat e Jashtëm të shtatë vendeve, përfshirë Turqinë, Indonezinë, Pakistanin, Arabinë Saudite dhe Jordaninë, si dhe përfaqësues nga Katar dhe Emiratet e Bashkuara Arabe.
Në qendër të takimit ishin: procesi i armëpushimit në Gaza, gjendja e ndihmave humanitare dhe hapat drejt një paqeje të qëndrueshme.
Pas samitit, ministri i Jashtëm turk Hakan Fidan doli në konferencë për shtyp, duke dhënë mesazhe të qarta për situatën aktuale.
“Izraeli po shkel armëpushimin. Që nga shpallja e tij, janë vrarë rreth 250 palestinezë. Këto sulme duhet të ndalen menjëherë,” deklaroi Fidan, duke shtuar se ndihmat humanitare janë bllokuar dhe shumë kamionë me ushqime e karburant nuk kanë hyrë në Gaza.
Fidan tha se Hamas është i gatshëm ta kalojë administrimin e Gazës tek një komitet përbërë nga palestinezë, ndërsa shtoi se po zhvillohen bisedime për krijimin e një forcë ndërkombëtare stabiliteti.
Sa i përket mundësisë që Turqia të dërgojë trupa në Gaza, ai u përgjigj:
“Puna për krijimin e një force ndërkombëtare është në zhvillim. Vendet pjesëmarrëse do të vendosin për dërgimin e trupave në varësi të mandatit dhe dokumentit përfundimtar. Turqia është e gatshme të bëjë çdo sakrificë për paqe, por dokumentet duhet të jenë në përputhje me qëndrimin tonë.”
Në fund, Fidan theksoi se administrata e ardhshme në Gaza duhet të drejtohet nga vetë palestinezët, me mbështetjen e bashkësisë ndërkombëtare.
“Ne besojmë se palestinezët duhet ta qeverisin Gazën. Jemi optimistë dhe do të vazhdojmë të punojmë për paqen,” përfundoi ai.
