Angazhimi i djalit me kontratë, reagon Sulejman Rushiti është gjithçka sipas ligjit

Pas publikimit të lajmit se drejtori i teatrit të Gostivarit, Sulejman Rushiti ka angazhuar djalin e tij me kontratë në të njejtin institucion ka reaguar vet drejtori Rushiti duke sqaruar se djali i tij ka qenë i angazhuar për për përkthimin e një vepre duke shtuar se kontrata është në regull dhe e hapur dhe ndodhet edhe në arkiv, shkruan Top24

Sulejman Rushiti

Miq, shokë dhe familjarë,
Kam marrë informacione nga disa prej jush se në këto ditë ka qarkulluar një lajm i bujshëm në disa faqe të panjohura, sipas të cilit e kam punësuar djalin tim në Teatrin e Gostivarit dhe ky lajm është paraqitur si një “skandal.” Ky është një lajm i pasaktë dhe pjesë e një fushate të pistë me të cilin nuk desha të merrem por për shkak të miqve dhe dashamirëve që më kanë lutur të reagoj dhe të mos hesht, po e bëj këtë sqarim.
E para, edhe sikur djali im të ishte punësuar në teatër, në përputhje me ligjet dhe rregullat, nuk do të kishte asgjë skandaloze. Ai është aktor dhe mjaft i talentuar madje. Megjithatë, ai ka zgjedhur të punojë në kompani ndërkombëtare falë trajnimeve dhe përgatitjes së tij, duke përfshirë njohuritë e tij në gjuhën angleze dhe shqipe.
Për më tepër, Lorean Rushiti, djalë im, është një përkthyes i talentuar dhe ka punuar në përkthimin e veprave teatrale. Disa nga përkthimet e tij janë shfaqur në skena të ndryshme. Shfaqjet e diplomës së tij, përveç disa veprave të tjera, mbajnë vulën e tij të përkthimit.
Ajo që është paraqitur si një “lajm skandaloz” është në të vërtetë një kontratë tërësisht të rregullt dhe të hapur, e cila ndodhet në arkiv, për një pjesë të përkthyer nga Lorean Rushiti dhe e vënë në skenë në Teatrin e Gostivarit. Pjesa në fjalë është “Karantina” nga Jean Pierre Martinez, e cila është përkthyer me lejen e autorit të saj. Për këtë punë, Loreani është paguar me honorar minimal, më pak se që paguhen përkthyesit e veprave të tjera, dhe vetëm një herë, jo me pagë mujore.
Të gjithë ata që merren me teatër e dinë se si funksionon angazhimi i përkthyesve dhe honoraristëve të tjerë. Është e trishtueshme që për interesa meskine apo për përplasje politike të ulëta, po përdoren edhe individë dhe institucione. E dinë se nuk ka as shkelje ligjore as skandal dhe mundohen të bëjnë gjyq publik.
Të gjithë ata që dëshirojnë ta dinë të vërtetën dhe që nuk kanë agjenda të tjera, e dinë se unë, pikërisht sepse nuk kam dashur dhe nuk dua ta partizoj teatrin, nuk kam qenë i angazhuar në asnjë parti politike në kohën që e ushtroj detyrën e drejtorit. As kam qenë në ndonje takim partiak, mbledhie dege apo tubim partiak.
Natyrisht, kam bindje dhe opinionet e mia politike, por ato i shpreh vetëm në hapësira dhe rrethana të përshtatshme, jo brenda institucionit të shenjtë të teatrit.
Asnjëherë nuk ka pasur dhe nuk do të ketë individë të diskriminuar apo të favorizuar për shkak të bindjeve partiake. Për sukseset e Teatrit të Gostivarit, nuk kam nevojë të flas shumë, sepse ato janë të dukshme, si në nivelin kombëtar ashtu edhe ndërkombëtar.
Në fund të këtij muaji, ne do të fillojmë dy projekte të reja dhe kemi ftesa për shumë festivale në rajon dhe më gjerë. E plotësojmë vazhdimisht me të punësuar të rinj personelin teknik. Së fundmi me një ndriçues. Jemi në proçes të punësimit edhe të katër aktorëve të rinj.
Teatri i Gostivarit do të mbetet në shërbim të të gjithëve. Unë do të vazhdoj t’i ftoj të gjithë, pa dallim partie apo përkatësie tjetër. Sigurisht, do të mundohem ta mbroj imazhin e teatrit, por edhe imazhin tim personal.
Dhe si të gjithë njerëzit e lirë do t’i shpreh mendimet e mia lirshëm.
Me respekt,
Sulejman Rushiti