Kryeministri Rama ka shpërndarë pamje të vizitueshmërisë së Butrintit këto ditë nga masa turistësh, a thua se kjo përbën më lajm e aq më tepër të lidhet me ndonjë sukses qeverisës.
“…Dhe nga Parku Kombëtar i Butrintit që zgjohet çdo ditë me zërat e vizitorëve që vijnë nga e gjithë bota për të prekur historinë dhe bukurinë, ju uroj një ditë të mbarë”, shkruan ai, duke i dhënë fjalëve të tij peshën e një “zbulimi të madh”.
Por ky nuk është lajm. Butrinti ka dekada nën një vizitueshmëri të rregullt turistike, pa u vënë ndonjëherë në diskutim madje as menaxhimi i Parkut, ndër të rrallat mirëmenaxhime shqiptare të një pasurie kombëtare, pavarësisht se në ç’udhëheqje politike dhe nga kush drejtor i emëruar aty.
Lajm këto ditë në Butrint është zbulimi i disa mozaikëve të rinj, si lajm i mirë ky, si dhe ai që pas shumë vitesh, as individë me status të caktuar publik(artistë, historianë, gazetarë, figura të njohura me peshë publike) nuk do munden dot të hyjnë aty pa paguar(dhjetë mijë lekë për person), duke zhbërë kështu një rregull të pashkruar që zbatohet në të gjithë botën në rastet e pasurive trashëgimore. Pra, një lajm i keq.
Ndodh kjo tashmë që Butrinti nuk është më një pasuri që menaxhohet nga shteti shqiptar, por që i është dhënë me koncension amerikanëve, një precedent i panjohur ky në botë. Për më tepër, nuk është thënë kurrë përse duhej të ndodhte kjo, pasi siç u cek më sipër, menaxhimi i Butrintit në vite nuk ka përbërë debat, veç rastit kur aty u lejua të hapej një lokal nga një privat. /tesheshi.com/
