Dy javë pas promovimit pompoz, asnjë lopatë në terren për parkun memorial për viktimat e zjarrit të modularit
Punimet në terren për parkun memorial për 14 viktimat e zjarrit në spitalin modular nuk kanë filluar ende, ndonëse funksionarët qeveritarë dhe deputetët e zonës gjashtë me shumë pompozitet u mblodhën para dy javëve në Tetovë për të shënuar fillimin e këtyre aktiviteteve, shkruan Portalb.mk.
I pyetur se pse ende nuk kanë filluar aktivitetet në terren, ministri i Shëndetësisë Azir Aliu nuk u përgjigj konketisht.
“Dje në ora 8 ose 9 në mbrëmje mbaroi takimi i fundit që kolegët nga Ministria e Shëndetësisë kanë pasur me familjarët dhe me një organizatë joqeveritare në Tetovë ku është analizuar edhe njëherë projekti, pra projekti është definitiv tash për shkak se kishim projekt ideor, projekti ideor u krijua bashkë me kërkesat e familjarëve dhe njëherë donim të ishim të sigurt që e gjithë infrastruktura e parkut memorial do të jetë në përputhje me kërkesat e tyre”, tha Aliu.
Parku memorial nuk do të ndërtohet në vendin ku ishte objekti i spitalit modular, por pak më poshtë. Sa i përket hapsirës ku do të bëhet, Aliu tha se ky është projekt shumë më i madh se sa e kanë kërkuar familjarët.
“Në vendin ku ka qenë objekti i cili është djegur do të ketë një bust të vogël i cili do të rrjedhë ujë gjatë gjithë kohës si simbol i jetës, ndërsa pjesa tjetër që është diku 60 mijë euro do të ndërtohet”, tha Aliu.
Kujtojmë që në qershor Nisma Zero së bashku me familjarët e viktimave të tragjedisë në spitalin modular dorëzuan në Komunën e Tetovës dhe Ministrinë e Shëndetësisë kërkesë ku propozojnë që hapsira ku ndodhej objekti i spitalit modular të shndërrohet në park memorial publik.
Hapsira ku ishte spitali modular u shndërrua në parking, ku pati edhe disa vetura të vjetra.
Kujtojmë që në nëntor të vitit 2022 drejtori i atëhershëm i Spitalit të Tetovës Amir Elezi paralajmëroi se në këtë në vendin ku ndodhej objekti i spitalit modular, parashihej të vendosej pllakatë përkujtimore për viktimat e tragjedisë. Mirëpo kjo pllakatë nuk u vendos asnjëherë.
Me 8 shtator 2021 në spitalin modular të Tetovës ku trajtoheshin pacientët me Kovid-19 ra një zjarr i tmerrshëm i cili mori me vete 14 jetë të pacientëve, por edhe të anëtarëve të familjeve që ndodheshin brenda. 14 persona u shpëtuan përpara se objekti të digjej plotësisht.
Shkaku i zjarrit i atribuohet kabllos së djegur ku shkëndija bëri që zjarri të përhapet dhe brenda pak minutash i gjithë spitali mori flakë.
Deri tani ka pasur dy procese gjyqësore për këtë rast, por të akuzuarit nuk u thirrën në përgjegjësi për shkaqet e zjarrit, por për vepra tjera penale, për mos vendosje të aparateve kundër zjarrit.
Në ndërkohë, pavarësisht se kanë kaluar gati dy vjet që kur Prokuroria Publike e RMV-së njoftoi se po zhvillohet një hetim i dytë nga Prokuroria për Ndjekjen e Krimit të Organizuar dhe Korrupsionit për zjarrin në spitalin modular, ende nuk ka vendim.
Në lidhje me mos sjelljen e drejtësisë për zjarrin e modularit, familjarët dhe qytetarët kanë organizuar disa protesta ku është kërkuar të hapet proces gjyqësor për shkaqet e zjarrit.
