Faton Ahmeti: Diskreditimi është bërë strategji politike!
Sekretari i përgjithshëm i BDI-së, Faton Ahmeti përmes një postimi ka reagur ndaj punësimit të 14 punësimeve të reja në arkivin shtetërorë ku të gjithë janë maqedonas dhe asnjë shqiptarë. Këtë veprim Ahmeti e cilëson si deskriditim dhe si një strategji politike, shkruan Top24
Diskreditimi është bërë strategji politike!
Këtë javë, në Arkivin Shtetëror të Maqedonisë së Veriut u punësuan 14 të rinj – të gjithë maqedonas, asnjë shqiptar.
Po, e lexuat mirë.
Në themelet të një shteti që pretendon se është multietnik dhe evropian, shqiptarët po përjashtohen në mënyrë sistematike nga institucionet publike.
Kjo nuk është rastësi.
Është model, është agjendë e heshtur politike.
Është përçmim i pastër institucional ndaj një kombi që është bashkëthemelues i këtij shteti.
Edhe më alarmante është fakti që për herë të parë pas Marrëveshjes së Ohrit, asnjë nga pozitat udhëheqëse në këtë institucion – as drejtori, as zëvendësdrejtori – nuk i takon një shqiptari.
Një institucion që ruan kujtesën shtetërore po tenton të fshin me vetëdije kontributin shqiptar nga historia dhe nga e ardhmja.
Në vend të bashkëjetesës dhe barazisë, kemi hyrë në një fazë të spastrimit institucional, ku shqiptarët po përjashtohen, ngadalë por me vendosmëri, nga çdo hallkë e shtetit.
E gjithë kjo ndodh sepse u shfuqizua balanceri, mekanizmi që ruante baraspeshën etnike.
Sot, pa atë mjet mbrojtës, institucionet po i ngjajnë gjithnjë e më shumë strukturave monoetnike nga një epokë tjetër – më e errët dhe më përjashtuese.
Por ajo që dhemb më shumë është heshtja.
Heshtja e atyre që vetëquhen përfaqësues të shqiptarëve – nëntë deputetë të VLEN-it, që e mbështesin këtë Qeveri dhe mbyllin sytë para kësaj fshirjeje masive.
Heshtja e tyre nuk është neutralitet.
Heshtja e tyre është bashkëpunim me diskriminimin.
Sot duhet të flasim.
Sot duhet të reagojmë.
Por jo për një vend pune, por për dinjitetin kolektiv të një kombi të tërë.
“Aty ku të nëpërkëmbin, nuk është vend për të heshtur. Sepse kush hesht përballë padrejtësisë, ndihmon zgjatjen e saj.”
– Martin Luther King Jr.
