Kërcënimi i fortë nga Kievi për 9 Majin rus

Presidenti ukrainas Volodymyr Zelensky tha të shtunën se Kievi nuk mund të garantojë sigurinë e liderëve botërorë që do të marrin pjesë në festimet e Ditës së Fitores në Moskë më 9 maj.

Duke iu përgjigjur ofertës së Moskës për një armëpushim tre-ditor rreth 9 majit, kur Rusia feston fitoren e saj ndaj Gjermanisë naziste në Luftën e Dytë Botërore, Zelensky tha se ishte gati për një armëpushim, por vetëm nëse do të zgjaste 30 ditë, raporton Reuters.

Në komentet e publikuara nga zyra e tij, presidenti ukrainas tha se për shkak të luftës me Rusinë, Kievi nuk mund të garantonte sigurinë e zyrtarëve të huaj që do të merrnin pjesë në festimet e Ditës së Fitores.

“Ne nuk mund të jemi përgjegjës për atë që ndodh në territorin e Federatës Ruse. Ata janë përgjegjës për sigurinë tuaj, kështu që ne nuk do të japim asnjë garanci.”

“Takimi më i mirë me Trump-in deri më tani”

Në postim, Zelensky flet gjithashtu për takimin e tij me Presidentin e SHBA-së Donald Trump në prag të funeralit të Papa Françeskut në Vatikan, duke thënë se ishte takimi i tyre më i mirë deri më tani.

Dyshja më pas ranë dakord se një armëpushim 30-ditor ishte një hap i parë i mirë drejt përfundimit të luftës në Ukrainë. Zelensky foli gjithashtu për temën e sanksioneve, dhe Trump iu përgjigj “shumë fuqishëm” kësaj, pretendon presidenti ukrainas, pa dhënë detaje.

Zelensky thekson se marrëveshja mbi mineralet kryesore e nënshkruar nga të dy vendet të mërkurën është e dobishme për të dyja palët. Kjo do t’i mundësojë Ukrainës të mbrojë investimet amerikane, si dhe territorin dhe banorët e saj, në të ardhmen.

Rëndësia e mbrojtjes ajrore

Nga ana tjetër, SHBA-të përfitojnë një avantazh në kontratat e reja ukrainase për mineralet e rralla dhe aksesin e investitorëve në rindërtimin e Ukrainës.

Duke folur për pjesën e sigurisë të marrëveshjes, Zelensky theksoi rëndësinë e një mbrojtjeje ajrore më efektive. Kjo është një kërkesë që Kievi e ka bërë që nga fillimi i luftës, e cila vijon prej tre vitesh.

“Prandaj, ne jemi të gatshëm që sistemet e mbrojtjes ajrore të jenë një kontribut në fond. I thashë atij sasinë e sistemeve që na duhen – ai tha se do të punonte për këtë, se këto gjëra nuk janë falas”, tha Zelensky. /tesheshi.com/