Në gjendje të dehur theu pajisjet e një ambjenti, babë e bir e rrahin me grushte 22-vjeçaren

Një ngjarje e rëndë është regjistruar mbrëmjen e djeshme në kryeqytet, ku dy persona, babë e bir, kanë dhunuar një vajzë të re 22-vjeçare. Ngjarja ka ndodhur në një subjekt privat në pronësi të njërit prej autorëve, ku e reja dyshohet se ka shkaktuar dëme materiale, pasi ndodhej në gjendje të dehur.

Sipas Policisë së Tiranës, konflikti ka degraduar në dhunë fizike, pasi pronari i subjektit, së bashku me djalin e tij, kanë goditur të renë me grushte. Për pasojë, të tre personat e përfshirë janë proceduar penalisht në gjendje të lirë.

“Specialistët për Hetimin e Krimeve të Komisariatit të Policisë Nr. 4 referuan materialet në Prokurori, ku nisi procedimi në gjendje të lirë për shtetasit: E. Q., 33 vjeç, P. Q., 62 vjeç (babë e bir) dhe A. Q., 22 vjeçe, pasi shtetasja A. Q. dyshohet se në gjendje të dehur ka thyer disa pajisje në subjektin e 62-vjeçarit, i cili bashkë me djalin e tij, ka goditur me grushte 22-vjeçaren”, thuhet në njoftimin zyrtar të Policisë.