Gjykata Speciale ka njoftuar se Trupi Gjykues ka shqyrtuar disa kërkesa të Mbrojtjes së ish-presidentit Hashim Thaçi në lidhje me dëshminë e ardhshme të dëshmitarit të saj të planifikuar, Wesley Clark (1DW-007).
“Pasi u informua se kjo dëshmi mund të fillojë vetëm më 18 nëntor pasdite, dhe pas shqyrtimit të kohës së nevojshme të vlerësuar nga palët, Trupi Gjykues miratoi kërkesën e Mbrojtjes për të rezervuar një ditë shtesë për seancë, më 21 nëntor, për të përmbyllur dëshminë. Trupi Gjykues deklaroi se kjo ditë shtesë është rezervuar për të përmbyllur në mënyrë të shpejtë dhe efikase paraqitjen e argumenteve nga Mbrojtja, por megjithatë u kërkoi palëve që të përpiqen ta përmbyllin dëshminë më herët nëse është e mundshme”, thuhet në njoftimin e Gjykatës Speciale.
Ndërkohë, për javën e ardhshme, seanca do të mbahet të hënën, më 10 nëntor 2025, nga ora 14:00 deri në 17:00.
