OKB-ja përshëndet procesin e çarmatimit të grupit terrorist PKK

Organizata e Kombeve të Bashkuara (OKB) përshëndeti fillimin e procesit të çarmatimit të grupit terrorist PKK, transmeton Anadolu.

“Mund t’ju them se ne e mirëpresim shumë operacionalizimin e marrëveshjes, të paktën hapin e parë të operacionalizimit”, tha zëdhënësi i OKB-së Stephane Dujarric në një konferencë për shtyp.

Komentet e tij erdhën pasi një grup prej 30 terroristësh të PKK-së, përfshirë 15 gra, sot i dorëzuan armët e tyre dhe i shkatërruan ato në provincën Sulejmanije të Irakut verior.

Grupi i terroristëve të PKK-së u mblodh në një shpellë brenda kufijve të nënrrethit Surdas të Sulejmanijes, dolën me armët e tyre dhe më pas vazhduan në një vend të përgatitur për procesin e çarmatimit.

“Shpresojmë se kjo do të inkurajojë hapa të mëtejshëm drejt paqes së qëndrueshme në rajon”, tha Dujarric, duke theksuar gatishmërinë e OKB-së për ta “mbështetur këtë në çdo mënyrë që mundemi, nëse na kërkohet”.

Në maj, grupi terrorist vendosi të shpërbëhej dhe të linte armët. Njoftimi pasoi një deklaratë të shkurtit nga udhëheqësi i burgosur i PKK-së, Abdullah Oçalan, i cili bëri thirrje për shpërbërjen e organizatës dhe grupeve të lidhura me të, duke kërkuar përfundimin e fushatës së armatosur që ka zgjatur për më shumë se katër dekada.

Në fushatën e saj 40-vjeçare terroriste kundër Turqisë, PKK-ja – e listuar si organizatë terroriste nga Turqia, SHBA-ja dhe BE-ja – ka qenë përgjegjëse për vdekjen e mbi 40.000 njerëzve, përfshirë gra, fëmijë, foshnja dhe të moshuar.

Terroristët e PKK-së kanë përdorur Irakun verior, pranë kufirit turk, për t’u fshehur dhe për të planifikuar sulme ndaj Turqisë.