“Pa mëshirë” për Veliajn

Apeli i Gjykatës së Posaçme e la në burg Erion Veliaj, por dërgoi nga qelia në arrest shtëpie biznesmenin Eman Abule. Pra, kryebashkiaku do vijojë të qëndrojë pas hekurave, në pritje të një verdikti tashmë nga Gjykata e Lart.

Avokati Maks Haxhia reagoi ashpër ndaj këtij vendimi, si dhe ndaj SPAK-ut, duke thënë se “veprat penale për të cilat akuzohet janë me karakter administrativ dhe mund të hetohen në gjendje të lirë”.

“Kemi kundërshtuar masën pasi rrezikshmëria është e lidhur me agresivitetin dhe mundësinë për të kryer vepra të tjera penale. Dhe vepra të rrezikshme dhe veprat penale janë ato që dëmtojnë jetën dhe shëndetin e individit, kurse veprat që kanë karakter më shumë administrativ dhe bazohen në ekspertë kontabël për të pasqyruar dëme efektive përmes akteve nuk janë aq të rrezikshme”, arsyetoi avokati i njohur.

Haxhia shtoi se shpreson që Gjykata e Lartë të ndryshojë masën e sigurisë ndaj Veliajt, pasi nuk garantohen kriteret për ta mbajtur në burg.

“Presim të ndodh ndonjë çudi në Gjykatën e Lartë. E natyrisht presim që të pranojmë kërkesën për zëvendësimin e masës së sigurisë për Erion Veliajn, pasi nuk konkuron asnjë nga kushtet dhe kriteret për të mbajtur në burg një person të tillë”, tha Haxhia. /tesheshi.com/