Pejgamberi a.s. pasohet nuk imitohet! – Hoxhë Halil Avdulli

Imam Gazaliu, një nga dijetarët e mëdhenj të Islamit, ka bërë dallimin ndërmjet marrjes së Pejgamberit alejhi selam si shembull dhe imitimit të tij, ai ka thënë:

“Respektimi dhe nderimi i të Dërguarit të Allahut nuk mund të bëhet duke i përngjarë atij, e ka shpjeguar këtë me një shembull: Respekti që i bëhet një mbreti është bindja ndaj urdhrave dhe ndalimeve të tij; jo të ulesh këmbëkryq ngaqë ai është ulur këmbëkryq, apo të ulesh në një divan ngaqë ai është ulur në një divan.

Gazaliu e ka kritikuar botëkuptimin se është sunet t’i ngjash Pejgamberit a.s..

Ngjashmëria ose imitimi që Gazaliu ka kritikuar këtu, nuk është përpjekja për t’u bërë si Muhammedi s.a.v.s., për sa i përket moralit dhe virtytit, por vetëm përpjekja për t’i ngjarë atij në aspektin e formës dhe pamjes. Të hash ato që ka ngrënë ai është përngjasim dhe imitim, kurse të hash diçka hallall brenda kornizës së rregullave të mirësjelljes të përcaktuara prej tij, pa kaluar në shpërdorim dhe pa u tejngopur, është pasim i tij. Të veshësh të njëjtat rroba që vishte ai në përputhje me zakonet dhe vendin e tij është përngjasim dhe imitim, kurse të veshurit pa shtirje dhe ekstravagancë, pa u larguar nga modestia dhe duke i mbuluar pjesët intime të trupit do të thotë ta ndjekësh dhe ta marrësh si shembull atë.

Hoxhë Halil Avdulli

Libri: „ E shoshitura” nga Ebu Hamid el-Gazali