Presidenti Erdoğan thekson rolin jetik të partneritetit Turqi-SHBA për stabilitetin rajonal dhe global

Presidenti turk, Recep Tayyip Erdoğan, ka theksuar përpjekjet në rritje të Turqisë për të nxitur paqen dhe stabilitetin në një mjedis global që ndryshon me shpejtësi, duke theksuar veçanërisht marrëdhëniet strategjike midis Ankarasë dhe Washingtonit, raporton Anadolu.

“Partneriteti Turqi-SHBA është jetik për vendosjen e stabilitetit në rajonin tonë dhe në botë. Ne po përpiqemi të krijojmë një platformë konstruktive dialogu dhe të orientuar drejt rezultateve”, tha Erdoğan gjatë fluturimit të tij të kthimit në Turqi pas vizitës në Tiranë, ku mori pjesë në samitin e Komunitetit Politik Evropian.

Ai bëri thirrje për një fokus të ripërtërirë në vlerat e përbashkëta dhe shtrirjen strategjike, veçanërisht brenda kornizës së NATO-s.

Erdoğan gjithashtu foli për tensionet e gjata në lidhje me bashkëpunimin në mbrojtje dhe sanksioneve, duke theksuar se, “Për sa i përket CAATSA-s, mund të themi se ka një dopbësi. Besoj se do ta tejkalojmë edhe procesin CAATSA shumë shpejt”.

Ndaj Turqisë në vitin 2020 u vendosën sanksione sipas CAATSA-s, respektivisht Aktit kundër Kundërshtarëve të Amerikës, për blerjen e sistemit rus të mbrojtjes raketore S-400.

Presidenti turk këmbënguli se nuk duhet të ketë kufizime në bashkëpunimin e mbrojtjes midis dy kombeve.

“Si dy aleatë të mëdhenj dhe anëtarë të NATO-s, nuk duhet të ketë kufizime apo pengesa mes nesh në fushën e mbrojtjes”, tha ai.

Erdoğan përsëriti pritjet e Ankarasë për heqjen e të gjitha pengesave që dëmtojnë aleancën strategjike.

“Pritja jonë më e madhe është të heqim të gjitha pengesat që janë në kundërshtim me frymën e partneritetit strategjik. Çdo hap pozitiv është i vlefshëm. Besoj se më shumë do të pasojnë”, tha ai.

Presidenti turk gjithashtu përshëndeti përparimin e fundit, duke theksuar se “Departamenti i Shtetit i SHBA-së ka miratuar një shitje raketash ajër-ajër në Turqi që tejkalon 300 milionë dollarë”.

Siria, Iraku dhe terrorizmi

Më tej, presidenti Erdoğan i bëri thirrje Evropës që të marrë përgjegjësinë për eliminimin e terrorizmit në Siri dhe të fillojë rindërtimin. Ai vlerësoi vendimin e fundit të SHBA-së për heqjen e sanksioneve ndaj Sirisë, duke e konsideruar atë si një shembull pozitiv.

“Unë e konsideroj vendimin e presidentit amerikan, z. Trump, për heqjen e sanksioneve ndaj Sirisë si shumë të rëndësishëm dhe kuptimplotë në këtë kontekst. Shpresoj se vendimi i mikut tim Trump do të shërbejë si shembull për të gjitha palët përkatëse, veçanërisht për BE”, tha Erdoğan.

Ai theksoi se Turqia mban lidhje të forta me qeverinë siriane.

“Aktualisht kemi marrëdhënie shumë të mira me administratën siriane. Presidenti sirian, z. Ahmed Sharaa e ka vizituar Turqinë dy herë. Ne patëm diskutime jashtëzakonisht produktive”, tha Erdoğan.

Kjo qasje, sipas tij, do të nxisë paqen dhe stabilitetin jo vetëm në Siri, por edhe në Irakun fqinj.

Lidhur me përpjekjet e brendshme dhe ndërkufitare kundër terrorizmit, presidenti turk tha se, “Dorëzimi i armëve nga organizata terroriste (PKK), zbatimi i plotë i vendimit të shpërbërjes dhe braktisja e paligjshmërisë janë thelbësore”.

Ai shtoi se po zhvillohen diskutime me vendet fqinje për çarmatosjen e elementeve terroriste jashtë kufijve turq.

Lufta Rusi-Ukrainë dhe konflikti Pakistan-Indi

Presidenti Erdoğan gjithashtu riafirmoi gatishmërinë e Turqisë për të ndërmjetësuar dhe promovuar diplomacinë.

“Ne do të bëjmë çdo përpjekje për t’i mbajtur kanalet e dialogut të hapura midis palëve dhe për të vazhduar negociatat”, tha Erdoğan në lidhje me Rusinë dhe Ukrainën, përfaqësuesit e të cilëve këtë javë ishin në Stamboll për bisedimet e para të drejtpërdrejta në tre vjet.

Presidenti turk konfirmoi se Turqia po ndërmjetëson në mënyrë aktive midis Washingtonit, Moskës dhe Kievit për t’i dhënë fund luftës, si dhe i bëri thirrje Evropës të mbështesë përpjekjet diplomatike të nivelit të lartë.

“Ne presim mbështetjen e të gjitha palëve ndërmjetësuese, përfshirë BE-në, për procesin e ndjeshëm që po zhvillojmë me presidentin e SHBA-së, z. Donald Trump, presidentin rus, z. Vladimir Putin dhe presidentin ukrainas, z. Volodymyr Zelenskyy, për të arritur shpejt paqen në Ukrainë”, tha Erdoğan.

Presidenti turk gjithashtu kërkoi nga Evropa “të lërë pas pengesat politike dhe qëndrimet paragjykuese” që kanë penguar një bashkëpunim të madh, si dhe paralajmëroi se dështimi për ta bërë këtë do të gërryejë konkurrencën dhe stabilitetin afatgjatë të Evropës.

“Evropa nuk e ka më luksin të qëndrojë e heshtur”, tha Erdoğan, duke iu referuar luftës së vazhdueshme në Ukrainë dhe krizës humanitare në Gaza.

“Ne nuk po themi thjesht ‘mbaroni luftën’, por po propozojmë metoda, po përgatisim terrenin dhe po bëjmë thirrje për veprim. Para së gjithash, për t’i dhënë fund luftës, armët duhet të heshtin dhe diplomacia duhet të flasë. Duhet të fillojnë negociatat për paqen dhe kjo mundësi nuk duhet humbur”, tha ai.

Në lidhje me konfliktin e fundit midis Pakistanit dhe Indisë, Erdoğan tha: “Nëse kërkohet nga palët, sigurisht se ne do ta bëjmë pjesën tonë. Ne duam paqe. Ne nuk duam asnjë tension midis dy fqinjëve”.

Kriza humanitare në Gaza dhe Bregun Perëndimor

Duke iu referuar dhunës së vazhdueshme në Gaza dhe Bregun Perëndimor, presidenti Erdoğan përsëri i bëri thirrje Evropës të thyejë heshtjen e saj dhe të marrë përgjegjësi aktive.

“Evropa nuk e ka luksin të qëndrojë e heshtur përballë tragjedisë humanitare në Gaza dhe sulmeve në Bregun Perëndimor. Ne do të vazhdojmë të përdorim të gjitha mjetet në dispozicion për të rritur presionin ndaj qeverisë së Netanyahu-t”, tha Erdoğan.

Ai kërkoi t’i jepet fund agresionit ushtarak izraelit dhe theksoi rrugën drejt paqes së qëndrueshme.

“Rruga drejt paqes së qëndrueshme në rajon qëndron në një zgjidhje me dy shtete. Mënyra më efektive është krijimi i një shteti palestinez gjeografikisht të afërt brenda kufijve të vitit 1967, me Kudsin Lindor si kryeqytet”, tha ai.

“Izraeli nuk mund të garantojë sigurinë e qytetarëve të tij duke vrarë dhjetëra fëmijë, gra dhe të pafajshëm nga Gaza çdo ditë. Sa më shpejt ta braktisin këtë gjendje furie, aq më mirë do të jetë për të gjithë”, shtoi ai.

Siç theksoi presidenti turk, Gaza nuk ka kohë për të humbur, as edhe një ditë.

“Ne e shprehim këtë në çdo platformë. Agresioni izraelit në Gaza duhet të ndalet”, theksoi Erdoğan.