Protestë para Parlamentit kundër projektligjit të barazisë gjinore – organizatorët: Duam të mbrojmë familjen dhe vlerat tradicionale
Një tubim paqësor u zhvillua sot përpara Parlamentit të Shqipërisë në Tiranë, ku qindra qytetarë morën pjesë për të shprehur shqetësimet e tyre lidhur me projektligjin e barazisë gjinore. Protesta u organizua nga Koalicioni “Pro Familjes dhe Jetës”, që theksoi rëndësinë e mbrojtjes së familjes tradicionale, të fëmijëve dhe të lirisë së shprehjes në vend.
Në fjalën e tij, Akil Pano bëri thirrje për unitet midis komuniteteve fetare dhe qytetarëve, duke paralajmëruar për ndikimet që, sipas tij, ky ligj mund të ketë në strukturën e familjes shqiptare. Ai e cilësoi momentin si një “kohë vendimtare për mbrojtjen e identitetit dhe vlerave kombëtare”.
Në protestë morën pjesë përfaqësues të komuniteteve myslimane dhe të Kishës Ungjillore, të cilët bënë thirrje për rezistencë paqësore dhe për dialog mbi çështjet që prekin familjen dhe shoqërinë.
Akil Pano falënderoi gjithashtu liderin e opozitës, Sali Berisha, dhe deputetët që kanë shprehur mbështetje për kundërshtimin e projektligjit, duke theksuar se “zëri i qytetarëve duhet të dëgjohet”.
Sipas organizatorëve, ky tubim është një sinjal për institucionet që qytetarët kërkojnë më shumë debat publik dhe transparencë mbi çështje që lidhen me familjen, fëmijët dhe vlerat shoqërore.
