Për Edi Ramën, vota për opozitën është votë jo vetëm që ngadalëson vrullin drejt Bashkimit Evropian, por edhe një shuplakë ndaj drejtësisë. Nga Berati, ku vijoi me turin elektoral, kryesocialisti Edi Rama tha se bufi dhe kukumjaçkat e tij nuk vranë vetëm një herë, por disa herë, e madje nuk kanë shfaqur as pendesë.
“Këta janë ata që nuk kanë asnjë pendesë, jo vetëm ndjesë, janë ata që kanë vrarë njerëz jo njëherë, por disa herë, bufi i kënetës dhe kukumjaçkat e tij, ishte ky buf vetëm para pak vitesh, aty ku jam unë sot, ku me keni çuar ju sot, ku nga dritarja shihte se si vriteshin njerëzit poshtë dritares së tij. Dhe kur kryeprokurorja i kërkoi të arrestoheshin 3 njerëzit e tij, ai i tha lavire bulevardi. Dhe pse ndodh kjo sot, sepse jam unë këtu, sepse i dhamë shpatën drejtësisë”, akuzoi Rama kundërshtarin e tij që ka deklaruar zhbërjen e reformës në drejtësi.
Për Ramën, Altin Dumani u bë i njohur fal reformës në drejtësi që bëri PS, duke e kthyer në një figurë, pasi dikur nuk e njihte njeri, edhe pse ishte prokuror.
“Këneta po thotë se do zhbëjë SPAK, që nuk e arrin dot, por BE na kërkon barazi ligjore. Shpatën e drejtësisë në zyrë, ia dhashë unë SPAK-ut, për të goditur edhe majtas, sepse për të shkuar në BE duhet barazi ligjore. Kurse këneta dhe qenëria e saj e sulmojnë Dumanin”, tha Rama mes të tjerash.
Të parin e listës së demokratëve në qarkun e Beratit, Enno Bozdon ku ndali turin e fushatës këtë të mërkurë e quajti figurë pa asnjë vlerë.
“Ata, këneta, kanë një Eno (Bozdo), një vazo arkeologjike që nuk e di nga e kanë gjetur për ta bërë deputet. Një qyp arkeologjik, pa vlerë, as fatorino nuk e vë unë atë, e për ça, për ta bërë deputet. Mos të torrollisemi me Enot dhe për Enot e arkeologjisë politike më 11 maj, se ne votat tona i kemi, por kjo është mundësia historike”, tha Rama.
Mes përfaqësuesve që mbajtën fjalën ishte edhe ish-kryebashkiaku Ervin Demo, që dha dorëheqjen për të kandiduar për deputet të qarkut, teksa mban edhe detyrën e drejtuesit politik të PS. Demo u shpreh se flet para grave dhe vajzave si ish-kryetar i tyre dhe jo si politikan, duke përmendur investimet e realizuara dhe projektet e ardhshme.
“Vetëm qeverisja socialiste e mundëson integrimin e Shqipërisë në BE. Ne do marrim një rezultat spektakolar më 11 maj, ne nuk e diskutojmë 5 me 2-shin. Ata të tjerët që kanë ardhur kanë ardhur si turista dhe do ikin si të tillë. Pesta është numri që i sjell fat këtij qyteti, me 5 mandate për qarkun tonë. kemi një grua në listën e sigurt dhe patjetër që do të nxjerrim edhe një grua të dytë për deputete me rezultatin që do të marrim”, tha ai mes të tjerash.
Ai solli në vëmendje PD-në, që sipas tij përfaqësohet me Ilir Vrenozin. Deklaratë kjo që vjen një ditë pasi militanti i Berishës e ofendoi nga takimi në Korçë, kryesocialsiti Rama kujdeset të nënvizojë se partia nuk mund të jetë peng e Vrenzoit që përdor gjuhë kënete.
“Ilir Vrenozi është fytyra e vërtetë e kënetës dhe fushatës së saj, e patë dje në Korçë, me të gjithë fjalorin vulgar në një sallë të ekzaltuar që do bëjnë Shqipërinë Madhështore, por që përfaqësojnë Shqipërinë e Kënetës”, tha Rama mes të tjerash, duke ironizuar opozitën.
Rama, në fjalën e tij vuri theksin te rëndësia e gruas dhe vajzës në parti dhe qeverisje, duke dhënë edhe shifrat e trefishuara deri tani, që nga koha kur erdhi në qeveri. Ai tha se gjysma e kandidateve në listën e mbyllur janë gra dhe 71 kandidate në listën e hapur. Ai iu përgjigj kundërshtarëve, duke thënë se nuk i shan burrat e djemtë se nuk kanë vlerë, por se Shqipëria ishte vetëm me një këmbë dhe përfshirja e grave dhe vajzave ishte i rëndësishëm për vendin.
Kryetari i PS, përshëndeti edhe burrat që rinin në këmbë në fund të sheshit ku ishin ulur gratë dhe vajzat, duke kërkuar duartrokitje për ta. Ai e kërkoi votën e 11 majit për Shqipërinë dhe jo për të, teksa ftoi edhe demokratët që “të mbyllnin hundët” dhe të votonin PS-në më 11 maj, sepse kështu Shqipëria anëtarësohet në BE.
