TIRANË – Kryebashkiaku i Tiranës, Erion Veliaj, ka fituar betejën në Gjykatën Kushtetuese. Gjykata ka rrëzuar vendimin e Këshillit të Ministrave për shkarkimin e tij nga detyra, pas propozimit të Këshillit Bashkiak të Tiranës, raporton media lokale.
Vendimi u mor në një votim të ndarë 5 me 3, duke bërë që Veliaj të vazhdojë mandatin si kryebashkiak dhe duke anuluar dekretin e Presidentit Bajram Begaj. Kjo do të shmangë edhe thirrjen e zgjedhjeve në kryeqytet.
Zyrtarizimi i vendimit pritet së shpejti nga Gjykata Kushtetuese, e cila do të publikojë edhe argumentet e saj për këtë çështje.
Vendimi vjen pas një seance publike më 31 tetor, që zgjati mbi 7 orë, ku Veliaj u përball me përfaqësues të qeverisë dhe presidencës. Shkarkimi i kryebashkiakut ishte propozuar nga Këshilli Bashkiak me argumentin se ai nuk ishte paraqitur në detyrë për 3 muaj, dhe u miratua nga qeveria më 25 shtator, me firmën e kryeministrit Rama.
