Selmani nga Ash: Azir Aliu ka mashtruar publikisht të gjithë stafin mjekësor në spitalin e Tetovës

Në konferencën për media, Genc Selmani, nga Departamenti i Shëndetësisë në Aleancën për Shqiptarët, akuzoi ministrin e Shëndetësisë për mashtrim publik:

“Ministrit të Shëndetësisë i kanë mbaruar gënjeshtrat. Edhe pasi mori përgjigje negative nga Fondi i Sigurimit Shëndetësor, Azir Aliu vazhdoi të mashtrojë punonjësit dhe opinionin se do të kishte punësim në Spitalin e Tetovës,” tha Selmani, duke shtuar se “kjo është një nga manipulimet më të mëdha të bëra ndonjëherë me personelin shëndetësor”.

Gjatë së njëjtës konferencë, Selmani theksoi se procesi është në kundërshtim të plotë me legjislacionin në fuqi:

“Ligji është i qartë – pas shpalljes së zgjedhjeve nuk mund të ketë punësime të reja përveç rasteve urgjente dhe të pashmangshme. Punësimi i stafit mjekësor nuk është urgjencë ligjore kur ekziston personel me kontrata aktive,” theksoi ai.

Në vijim të konferencës, ai akuzoi ministrin se e ka përdorur situatën për qëllime elektorale:

“Ky proces nuk kishte për qëllim përmirësimin e shëndetësisë, por marketingun politik të ministrit. Lista përfshinte edhe militantë të VLEN-it, gjë që e bën të qartë se kemi të bëjmë me shfrytëzim elektoral të dinjitetit të mjekëve dhe infermierëve,” deklaroi Selmani.