Ministrja e Jashtme e Shqipërisë, Elisa Spiropali, ka vizituar ish-presidentin e Kosovës, Hashim Thaçi, në paraburgimin e Gjykatës Speciale në Hagë.
Në një prononcim për mediat, Spiropali tha se Thaçin e gjeti në gjendje të mirë dhe të informuar mbi zhvillimet në Kosovë dhe Shqipëri.
“Në paraburgimin e Gjykatës Speciale këtu në Hagë, takova presidentin Thaçi dhe përmes tij përcolla përshëndetjet e mia, të qeverisë shqiptare dhe të popullit shqiptar edhe për tre luftëtarët e tjerë: Kadri Veselin, Jakup Krasniqin dhe Rexhep Selimin”, u shpreh Spiropali.
Ajo shtoi se lufta e drejtë e UÇK-së nuk mund të njolloset apo baltoset, duke theksuar mbështetjen e qeverisë shqiptare për një proces të rregullt dhe të drejtë në Hagë.
“I shpreha mbështetjen e Ministrisë së Jashtme, të qeverisë shqiptare dhe të kryeministrit Rama për një proces që të prodhojë drejtësi historike, jo padrejtësi historike”, deklaroi ministrja.
Spiropali gjithashtu uroi që vendimi i Kosovës për të themeluar Dhomat e Specializuara dhe Gjykatën Speciale të mos kthehet në të kundërtën e tij.
