Ministrja për Evropën dhe Punët e Jashtme e Shqipërisë, Elisa Spiropali, ndodhet për një vizitë zyrtare në Hagë, në Mbretërinë e Holandës.
Gjatë vizitës, Spiropali do të pritet nga Ministri i Jashtëm holandez, David van Weel, me të cilin do të firmosë një deklaratë të përbashkët për forcimin e partneritetit dypalësh, në kuadër të mbështetjes për integrimin europian të Shqipërisë.
Ministrja do të falënderojë homologun e saj për rekomandimin pozitiv që qeveria holandeze i ka dërguar parlamentit të vendit, për hapjen brenda nëntorit të grupkapitullit 5 të negociatave të anëtarësimit të Shqipërisë me Bashkimin Europian.
Në takim do të diskutohen gjithashtu mundësi të reja bashkëpunimi në fusha me interes të përbashkët, si ekonomia, siguria dhe shkëmbimet akademike.
Gjatë qëndrimit në Holandë, Ministrja Spiropali do të vizitojë ish-Presidentin e Kosovës, Hashim Thaçi, në institucionin e Paraburgimit të Gjykatës Speciale në Hagë.
Po ashtu, ajo do të mbajë një leksion të hapur në Universitetin e Shkencave të Aplikuara të Hagës, për studentët dhe akademikët e Programit të Studimeve Europiane, ku do të flasë mbi angazhimet e Shqipërisë për garantimin e standardeve europiane.
Në përmbyllje të vizitës, Spiropali do të mirëpritet në Ambasadën e Shqipërisë në Hagë, ku do të zhvillojë një takim me rrjetin e profesionistëve të rinj shqiptarë që jetojnë në Holandë.
