Thaçi nga Haga: Pse jam këtu…

Nga qelitë e Hagës, ish-presidenti Hashim Thaçi ka dhënë një intervistë për Klan Kosova duke folur për arrestimin e tij nga Specialja.

Thaçi është shprehur se ndihet i abuzuar me arrestimin që i është bërë, duke lënë të nënkuptuar ndërkombëtarët, ndaj të cilëve ka tentuar të jetë i kujdesshëm gjithsesi.

“Jo nuk ndihem as i tradhtuar, as i mashtruar. Ndihem i abuzuar nga ata që në emër të diçkaje fiktive pa të drejtë më shkëputën nga familja, me përjashtuan nga puna, m’i morën vitet më të bukura të jetës.

Perëndimi dhe SHBA-të nuk servuan rrëfimin e lëndës. Kam punuar me disa administrata amerikane, efektivisht në raporte të shkëlqyera.

Nga presidentet Clinton mandati i dytë 1996-20, Bush i riu 2000-2008, Obama dhe Biden 2008-2016, Trump 2016-2020, në ngjarje dhe kohë të ndryshme në SHBA kam folur për Kosovën edhe me presidentin Bush i vjetër dhe J. Carter”, tha ai.

Edhe pse e ka të qartë se çuarja e tij në Hagë nuk është çështje drejtësie por politike, Thaçi tha se beson te drejtësia.

“Narrativat historike dhe agjendat politike në sistemet demokratike nuk marrin përgjigje përmes burgjeve. Edhe në këtë situatë dhe çdoherë unë do i besoj drejtësisë. Nga dita e parë, nuk e kaloj kohën duke e menduar veten nxitimthi, por me durim”, u shpreh ai.

Po cila është kritika e Thaçit për Specialen?

“Handikepi i kësaj gjykate është mungesa e një mekanizmi kujdestarie legjislativ, që me përpikëri do të zhvendosnin barometrin në favor të fakteve reale e jo pretenduese apo imagjinare. Faktet duhet të vlerësohen sipas bindjes juridike dhe jo të interpretohen sipas dëshirës apo përcaktimit paraprak”, tha Thaçi.

Por a mund të shmangej votimi i Speciales?

“Kosova ishte përballë dy sfidave: të themelojë këtë gjykatë vet në koordinim me SHBA-të dhe Bashkimin Evropian, ose Kosovës do t`i imponohej një gjykatë e njëjtë, por e themeluar nga Këshilli i Sigurimit të OKB-së, me rol aktiv të Rusisë dhe Kinës, por që do të përkrahej edhe nga SHBA dhe BE”, tha Thaçi, duke vijuar të argumentojë:

 “Kosova bëri zgjedhjen e parë që ishte shumë sfiduese, por më e përgjegjshme. Me garancë nga partnerët amerikanë dhe evropianë se do të punohet me legjislacionin kosovar, pra jo vetëm të merret parasysh, por, nënvizoj, detyrimisht të respektohet”.

Sa për stilin e tij qeverisës, ai tha:

“Po, kam bërë plot gabime, por nuk kam gënjyer dhe mashtruar. Nuk kam synuar të bëjë idealin, besoj kam bërë realistin. Kam ecur paralel me parimoren dhe pragmatiken, jam munduar të tregohem sa më pak egocentrik”.

Thaçi dha dhe qëndrimin e tij mbi atë se pse është pas hekurave në Hagë.

“Jam këtu jo për atë se kam bërë ndonjë plan të gabuar, por për atë se kush kam qenë, kë dhe si e përfaqësoja dhe ndoshta edhe kush jam, apo edhe se kam ndryshuar shumë në taktikë, por kam mbetur po ai që kam qenë në strategji për të mirën e shtetit dhe qytetarit. Dikush tha: ‘Ke bërë hapa më të shpejtë seç duhej bërë’”.