Fondacioni Hind Rajab ka bërë të ditur se pas një hetimi njëvjeçar ka identifikuar njësinë ushtarake izraelite dhe komandantin përgjegjës për vrasjen e vajzës gjashtëvjeçare palestineze, Hind Rajab, në Gaza në vitin 2024, si dhe për vrasjen e familjarëve të saj dhe dy mjekëve që tentuan ta shpëtonin.
Sipas deklaratës së fondacionit, “nën urdhrin e këtij komandanti, një njësi tankesh izraelite sulmoi makinën civile të familjes së Hindit dhe më pas shkatërroi ambulancën e Gjysmëhënës së Kuqe Palestineze që ishte dërguar për ta shpëtuar atë”.
“Do t’i ndjekim penalisht të gjithë oficerët e përfshirë – ata që dhanë urdhrat, ata që qëlluan, ata që e mbuluan dhe ata që e lejuan të ndodhte,” tha fondacioni, duke i bërë thirrje Gjykatës Penale Ndërkombëtare të lëshojë një urdhër arresti.
Hind Rajab u vra më 29 janar 2024, kur makina në të cilën ndodhej me gjashtë anëtarë të familjes u godit nga zjarri i tankeve izraelite. Familjarët e saj humbën jetën menjëherë, ndërsa vajza gjashtëvjeçare mbeti gjallë për disa orë, duke pëshpëritur me zë të dridhur në telefon me ekipin e ndihmës: “Kam shumë frikë… ju lutem ejani.”
Ambulanca që u dërgua për ta shpëtuar u godit gjithashtu nga zjarri izraelit, duke vrarë menjëherë dy mjekët që ndodheshin brenda saj. /mesazhi
